Aita ez da gudaria

Aita ez da gudaria
baina guda etorri denean
etxeko atera joka,
hartu eskuan aizkora
eta gudariz mozorrotu da.

Aita ez da gudaria
eta amak badaki
eta isilik dabil negarrez izkinean,
zeren gudaria ez den aita
gudara doa.

Aita ez da gudaria,
aita aizkolaria da,
baserritarra da
eta batzuetan margolaria,
aita senarra da,
semea da
eta bereziki
aita aita da,
baina ez da gudaria.

Aita ez da gudaria
baina gudara doa,
sentzugabeko guda
norbaitek hasia,
aita bezalako
gudari ez-gudariak
borrokatutako guda,
gurea ez den guda,
baina gure etxeak erreko dituena,
gure landak lapurtu
eta eraman gure semeak
eta baliteke berarekin
aita ere joatea,
gudaria ez den gudaria
bueltatuko al da inoiz etxera?

Itsasertzean oroimenak

Etxean naiz berriz,
paseoan betidako kaletatik,
eseriko naiz Donostiako portuan
eta txikitako oroimenak datorzkit,
olatuen orroen gainetik
abesti zahar bat norbaitek ari da kantari,
itsasoaren doinua al da hori?
hainbeste maite dudan itsasoa
ari al zait kantari?
eta abesti zaharraren letrekin
gaztetako oroimenak datorzkit.

Zenbat egun,
zenbat gau
eman genituen hemen eserita?
itsasoaren abestia
atzealdeko melodia,
gure maitasunaren gatibu.

Joan eta etorritako uneak,
izan ginen umeak,
txiki eta xaloak
oroimenaren gela hutsean,
denboraren menpean
galdu dira,
baina itsasertzean eserita,
olatuen orroekin batera
instant txiki batez oroitu
eta berriz izango gara umeak

Zenbat egun,

zenbat gau

eman genituen hemen eserita?

itsasoaren abestia 

atzealdeko melodia,

gure maitasunaren gatibu.

Joan eta etorritako uneak

izan ginen gazteak

itxaropenez beteak

maitaleak,

apurtutako gutunetan

malkoek ezabatutako letretan

bizi dira,

baina itsasertzean eserita,

olatuen orroekin batera
instant txiki batez oroitu

eta izango gara berriz maitaleak

Zenbat egun,

zenbat gau

eman genituen hemen eserita?

itsasoaren abestia 

atzealdeko melodia,

gure maitasunaren gatibu.

Etxean naiz berriz,

paseoan betidako kaletatik, 

eseriko naiz Donostiako portuan

eta txikitako oroimenak datorzkit,

olatuen orroen gainetik

abesti zahar bat norbaitek ari da kantari,

itsasoaren doinua al da hori?

hainbeste maite dudan itsasoa 

ari al zait kantari?

eta abesti zaharraren letrekin

gaztetako oroimenak datorzkit.